Глобалната потрошувачка на јаглен во 2022 година ќе се зголеми за 1,2 отсто и за прв пат ќе надмине 8,0 милијарди тони за една година и претходниот рекорд поставен во 2013 година, објави денеска Меѓународната агенција за енергија (ИЕА).
Годишниот извештај на ИЕА, исто така, предвидува дека потрошувачката на јаглен ќе остане на тоа ниво до 2025 година, бидејќи падот на користењето на овој извор на енергија во развиените земји се компензира со континуираната силна побарувачка во азиските економии во развој.
Тоа значи дека јагленот ќе продолжи да биде најголемиот единствен извор на емисии на јаглерод диоксид во глобалниот енергетски систем, истакнува ИЕА, пренесува Ројтерс.
Се проценува дека најголем пораст на побарувачката на јаглен ќе има во Индија, 7,0 отсто, потоа во Европската унија 6,0 отсто и Кина со 0,4 отсто.
Светот е блиску до врвот на употребата на фосилни горива, при што потрошувачката на јаглен прва опаѓа, но ние сè уште не сме блиску – вели Кеисуке Садамори, директор за енергетски пазари и безбедност во ИЕА.
Побарувачката за јаглен во Европа е зголемена поради поголемата промена од гас на јаглен поради високите цени на гасот и поради намалениот прилив на руски гас.
Сепак, европската побарувачка на јаглен се очекува да падне под нивото од 2022 година до 2025 година, се вели во извештајот.
Глобалното производство на електрична енергија на јаглен ќе се зголеми на нов рекорд од околу 10,3 терават-часови оваа година, додека производството на јаглен ќе скокне за 5,4 отсто на околу 8,3 милијарди тони, што е исто така рекорд на сите времиња.
Производството се очекува да достигне врв следната година и се очекува да падне под нивото од 2022 година до 2025 година. Трите најголеми производители на јаглен – Кина, Индија и Индонезија – ќе постигнат рекорди на производство оваа година, но и покрај високите цени и добрите маржи за производителите на јаглен, таму нема знаци за зголемени инвестиции во проекти за јаглен предводени од извоз.
Ова укажува на претпазливост кај инвеститорите и рударските компании кон среднорочните и долгорочните изгледи за јагленот, се вели во извештајот.