Повеќето Британци сакаат да се вратат во ЕУ

64

Процентот на Британци кои сметаат дека излегувањето на Велика Британија од Европската унија (ЕУ) било грешка достигна рекордно високо ниво и го надмина мнозинството, покажува најновата анкета на YouGov.

Со малку економски придобивки по Брегзит, 57 отсто од Британците, анкетирани во јули, сметаат дека одлуката за напуштање на ЕУ во 2016 година е погрешна, во споредба со 32 отсто кои сметаат дека е исправна.

Повеќе од половина, 55 отсто, би гласале за повторно влегување во ЕУ, наспроти 31 отсто кои рекле дека би биле за останување надвор од Унијата доколку референдумот се одржи на денот на гласањето. Пред нешто повеќе од две години, во јануари 2021 година, 49 отсто од анкетираните изјавиле дека ќе гласаат за повторно приклучување, а 37 отсто би биле против.

Премиерот Риши Сунак во мај изјави дека Брегзит носи предности, наведувајќи ја политиката на слободни пристаништа и намалувањето на ДДВ, пренесува Index.hr.

63% од Британците сметаат дека Брегзит е неуспешен
Економистите велат дека слободните пристаништа, специјалните зони кои содржат даночни и царински олеснувања и поедноставени трговски регулативи, веројатно нема да ја поттикнат британската економија, но може да имаат ограничена вредност како алатка за регионален развој.

Британските деловни инвестиции едвај пораснаа од средината на 2016 година, за разлика од другите напредни економии. Додека економистите кои го поддржуваат Брегзит укажуваат на фактот дека капиталот силно растеше во годините до 2016 година и требаше да забави, деловните анкети укажуваат на Брегзит како една од причините за стагнацијата.

Анкетата на YouGov во која учествуваа повеќе од 2.000 Британци покажа дека 63 отсто сега го гледаат Брегзит повеќе како неуспех отколку успех, во споредба со 12 отсто кои го сметаат за повеќе успех.