Позитивна вест од ЕУ: Постигнат е консензус за Македонија да почне преговори со ЕУ

128

На денешната прес конференција, вицепремиерот за евроинтеграции, Бујар Османи изјави дека од Брисел се стигнати вести дека е постигнат консензус за почнување преговори со Македонија, и тоа безусловни.

“Ова е консензус од 27 земји членки после сите разлики кои постоеја во последните 15 години. Денес сакав да разговарам за координацијата со ЕУ во поглед со справување со Ковид – 19. Како земја преговарач може да бидеме дел од европскиот солидарен фонд, формиран 2012 година од кој до сега се искористени пет милијарди евра во Унијата. Со оваа одлука влегуваме во тој фонд“, изјави Османи.

Во исклучително сложени услови под кои функционираат институциите на ЕУ, под силен притисок на предизвиците во соочувањето со КОВИД-19, доцна синоќа, телото кое го сочинуваат претставниците на земјите – членки на ЕУ во Брисел, познато како КОРЕПЕР, го усогласија првиот консензус – заклучокот за почеток на преговорите со Република Северна Македонија, истакна Османи, посочувајќи дека овие заклучоци ќе се најдат на следната седница на Советот за општи работи на ЕУ (ГАК), каде се очекува овие заклучоци да бидат потврдени.

„Ова е важна вест, не само како потврда за нашиот успех, туку и важна вест во овие моменти кога и ние се соочуваме со предизвиците од епидемијата предизвикана од вирусот КОВИД 19. Покрај заканата за јавното здравје, оваа епидемија претставува и огромен предизвик за одржување и на пристојна економска активност, и финансиската стабилност на земјата. А како земја кандидат за членство во ЕУ, и еве очигледно наскоро, како земја – преговарач, очекуваме да бидеме дел од пакетот мерки, активности и протоколи, кои во моментот се подготвуваат од страна на Европската Комисија ” истакна Османи, претставувајќи дел од мерките за соработка и помош од ЕУ, за кои Владата со писмо се обрати до Европската Комисија.

Османи во продолжение престави дел од првичните мерки кои во име на Владата со писмо до Еврокомесарот за проширување Оливер Вархеји ги претстави на Европската Комисија:

  • Вклучување во Европскиот солидарен фонд за природни непогоди, кој на барање на Европската Комисија ќе биде проширен и за справување со последиците од Ковид -19, а во кој пристап имаат земјите – членки и земјите кои преговараат за членство;
  • таканаречена награда за успешност (Performance award) во износ од 50 милиони евра, која ни беше доделена поради успешна реализација на ИПА средствата, да биде пренаменета во поддршка за справување со предизвиците од епидемијата, наместо за приоритетите за кои првично беше планирана;
  • согласно иницијативата на Европската Комисија, за финансиска поддршка за ликвидност на претпријатијата погодени од епидемијата, побаравме пристап до овие средства и на Банката за поддршка на развојот на Република Северна Македонија, со што би се обезбедиле брзи краткорочни заеми за поддршка на ликвидноста на нашите мали и средби претпријатија;
  • измена и на минималните критериуми  за искористување на фондовите од ИПАРД 2 програмата, во кои сметаме на зголемување на делот што претставува учество на ИПА фондовите, а на сметка на сопствениот капитал на производителите на храна и земјоделците. Само за потсетување, ваквата слична мерка беше применета и за време на кризата со поплавите, кога учеството на ИПА фондовите беше 75%

Покрај учеството во програмите и мерките на Унијата, Османи пренесе дека ќе побара од Европската Комисија, земјава да биде исклучена од рестрикциите на единствениот пазар на ЕУ, а кои се однесуваат на најмногу на медицински материјали и опрема.

На крајот, Османи информираше за одлуката на Норвешка идно да ослободи 3,2 милиони евра за итна реализација преку програмата на УНОПС, средства кои веднаш се ставаат на располагање на Северна Македонија, Србија и Црна Гора, за медицински материјали, препарати и средства, стои во соопштението.