Престолонаследникот Мохамед бин Салман продолжува да ги поместува границите со грандиозни визии што го редефинираат Блискиот Исток…
Неговиот најнов мегапроект – мостот преку Црвеното Море, веќе наречен „Мостот на Мојсеј“ во јавноста, ќе го поврзе Рас Ал Шеик Хамид во Саудиска Арабија со познатото египетско одморалиште Шарм ел Шеик, преку островот Тиран.
Со проценет буџет од 4 милијарди долари и должина од 32 километри, овој монументален потфат претставува прв инфраструктурен мост од ваков вид во овој регион. Покрај тоа што физички ќе поврзува две клучни арапски држави, мостот ќе стане и симбол на стратешка поврзаност, архитектонска моќ и политичка визија.
На саудиската страна, мостот директно ќе се поврзе со спектакуларниот развоен проект NEOM – футуристички град вреден 500 милијарди долари, замислен како симбол на дигиталната, енергетската и еколошката револуција во срцето на пустината. На египетската страна, трасата ќе води до Новиот административен главен град, кој се наоѓа 45 километри источно од Каиро.
Овој трансконтинентален проект е клучна точка на Визијата 2030, амбициозната стратегија на Саудиска Арабија за економска диверзификација и развој на туризмот. Се очекува бројот на саудиски туристи во Египет да се зголеми од 300.000 на над 1,2 милиони годишно, бидејќи патувањето до египетските одморалишта ќе стане едноставно и брзо – возењето ќе трае само 30 минути.
Министерот за транспорт на Египет, Камел Ел Вазир, изјави за Ројтерс дека „тие се подготвени да го спроведат без разлика дали ќе одлучат за мост или тунел“. Сепак, сè укажува дека мостот ќе стане икона на модерното инженерство, кое трајно ќе ги поврзува бреговите на Црвеното Море и двете цивилизации.
Проектот не само што го олеснува патувањето, туку претставува и нова архитектонска визија за регионот, каде што луксузот, технологијата и културното наследство одат рака под рака. А кога станува збор за MBS, нема граници на можното – само следниот чекор во иднината.
Фото: Pixabay