Приходите од посетите на Акропол се зголемени за 14 милиони евра во однос на минатата година, изјави грчката министерка за култура Лина Мендони.
Обраќајќи им се на пратениците во парламентот, таа посочи дека за таквиот успех е заслужна „надградбата на сите служби“, пренесе Катимерини.
Мендони изјави дека зголемувањето на приходот на ова исконско историско место на 60 милиони од 46 милиони евра се должи пред сè на новиот систем на електронски билети.
Пратениците од опозицијата се спротивставија на одлуката за зголемување на трошоците за влез во комплексот, кои велат дека ќе се зголемат за дури 300 проценти.
Министерот одговори дека новата цена за посета на Акропол ќе биде во согласност со политиката во другите земји-членки на ЕУ и дека ќе се имплементира во април 2025 година.
Таа рече дека „во споредба со националните споменици со слични димензии во другите земји од ЕУ, цените на билетите во Грција се значително пониски“.