Производителот на батерии ACC, заедничко вложување помеѓу мултинационалниот автомобилски гигант Stellantis и германскиот Mercedes, ја прекина изградбата на фабрики во Германија и Италија и планира да се фокусира на развој на поевтини батерии поради намалената побарувачка за електрични возила.
ACC вели дека тие мора да истражуваат и да развијат евтини батерии за да ги поевтинат електричните возила. Тие планираат да ја потврдат временската рамка за изградба на фабриките на крајот на 2024 или на почетокот на 2025 година.
ACC гради фабрики во италијанскиот Термоли и во германскиот Кајзерслаутерн, а моментално го зголемува производството во првата фабрика на северот на Франција.
Растот на европскиот пазар на електрични возила е значително забавен бидејќи купувачите се свртеа кон хибридни и бензински автомобили поради високите каматни стапки и намалувањето на владините стимулации, забележува Ројтерс.
Во исто време, европските производители се соочуваат со жестока кинеска конкуренција, која главно користи поевтини литиум-железо-фосфатни батерии, бидејќи тие значително ги намалуваат трошоците за производство.
Така, Stellantis се договори со кинескиот производител на батерии за електрични возила, CATL, да изгради фабрика за таа категорија на батерии во Европа.
„Ние ќе ги прилагодиме нашите инвестициски планови за електрични возила на динамиката на нивниот раст на продажбата на пазарот“, рече извршниот директор на Stellantis, Карлос Таварес, одговарајќи на новинарско прашање дали компанијата сè уште ги поддржува трите фабрики на ACC во Европа, покрај онаа што ја се гради со CATL .
„Ние не ја контролираме динамиката (на продажбата)“, додаде Таварес.
Од Мерцедес, пак, велат дека продолжуваат да ја поддржуваат заедничката компанија ACC и продолжуваат со реализација на планот за електрификација.
ACC е во сопственост на 45 отсто од Stellantis, Mercedes има 30 отсто, а останатите 25 отсто се во сопственост на Safta, батерискиот крак на француската TotalEnergies.