Производствената активност во еврозоната повторно се намали во септември, со пад на новите нарачки и забрзување на темпото на намалување на работните места, според најновото истражување на S&P Global за Hamburg Commercial Bank (HCOB).
Според ова истражување, индексот на менаџери за набавки во индустријата во еврозоната (PMI) исто така беше за 0,9 поени понизок во септември во споредба со претходниот месец, на 49,8 поени. Со тоа, повторно падна под нивото од 50 поени, сигнализирајќи мал пад на активноста. Во август, да потсетиме, тој надмина 50 поени за прв пат од средината на 2022 година.
Сепак, производството повторно се зголеми скромно во септември, седми месец по ред, но темпото на закрепнување е многу слабо и нема индикации дека би можело да се забрза во догледна иднина, нагласи главниот економист на HCOB, Сајрус де ла Рубија.
Побарувачката ослабе во споредба со август, додаде Де Ла Рубија, по стагнацијата во текот на пролетта и летото, објавува Хина, а компаниите исто така отпуштаа работници и ги намалуваа залихите во септември. Бројот на работни места забележа најголем пад за три месеци во септември.
„Стагнацијата во индустријата може да се протолкува и како добар знак“, забележува Де Ла Рубија, објаснувајќи дека производителите всушност се држат „неочекувано добро“ и покажуваат отпорност на неповолни фактори како што се американските тарифи, политичката несигурност во Франција и Шпанија, почетокот на новата влада во Германија и пошироките геополитички тензии.
Сепак, според него, на компаниите ќе им биде сè потешко да работат со профит и да ја одржат конкурентноста ако високите трошоци за енергија и „бирократските оптоварувања“ продолжат подолг временски период.
Во таква средина, воопшто не е изненадувачки што очекувањата на бизнис лидерите во индустријата во Еврозоната за следните 12 месеци се под просекот од изминатите десет години, заклучува главниот економист на HCOB.