Во јавноста протекоа два мејлови кои Илон Маск им ги испратил на своите вработени минатиот месец, а во кои зборува за слушање музика во фабриката, но и за начинот на кој повисокото раководство треба да се однесува со неговите упатства и одлуки. Мејловите беа испратени откако Tesla објави рекордни резултати за третиот квартал, постигнати во ситуација кога речиси сите автомобилски компании имаат проблеми со недостиг на чипови и производство на возила.
Во првиот мејл Маск напиша дека поддржува слушање музика во фабриката, како и сите други ситници кои можат да им помогнат на работниците повеќе да уживаат во својата работа. Тој го впери палецот нагоре кон секој што сака да ги носи слушалките, но да има слушалки само на едно уво, за да може со другото уво да ги слушаат сите известувања поврзани со безбедноста. Исто така, нема ништо против музика од звучниците во фабриката, но само доколку работниците претходно се договорат за изборот на музиката.
Тој, исто така, ги покани сите вработени да контактираат со него доколку имаат други идеи за начините на кои можат да си го поправат денот затоа што „крајно се грижи“ работниците со нетрпение да дојдат на работа.
Во друг мејл, кој го испратил до менаџерите, тој јасно ставил до знаење како треба да постапат кога им ги испраќа своите упатства и како треба да се однесуваат со нив. Постојат три начини на кои тие треба да дејствуваат, и ако не сторат ништо од ова, од менаџерите ќе биде побарано веднаш да се повлечат.
Првото нешто што можат да го направат кога Маск ќе им испрати е-пошта со директни инструкции е да му испратат е-пошта со објаснување зошто греши.
Втората работа е, во случај поштата да е напишана двосмислено или нејасно, да побараат дополнително објаснување, а третата работа е да го направат тоа што тој го побарал од нив.
Ако тоа не се случи, ќе добијат отказ.
