За четири до пет години повеќе нема да се грижиме за тоа што ќе остане од автомобилската индустрија во Европа – нема да ни остане ништо, драматично изјави Стефан Хартунг, извршен директор на Бош (Bosch).
Бош е германски и светски гигант во производството на автомобилски делови, кој остварува годишен приход од 92 милијарди евра.
„Неопходно е итно преиспитување на одлуката за забрана на моторите со внатрешно согорување во ЕУ за да се спречи егзодусот на оваа индустрија од Европа. Крајот на употребата на бензинот и дизелот може да има драстични последици за автомобилските региони. Ако ЕУ сака да ги избегне, мора брзо да реагира“, вели Хартунг.
Тој не е против замена на фосилните горива во транспортот, но смета дека овој процес мора да биде постепен и дека треба да се земат предвид спецификите на поединечните членки на ЕУ, особено кога станува збор за изворите на електрична енергија.
-Постојат европски региони кои речиси исклучиво произведуваат електрична енергија од фосилни горива. Потребни ни се повеќе технологии – рече Хартунг.
Тој потсети на потенцијалот на горивните ќелии, приклучните хибриди чии мотори се напојуваат со гориво од органски отпад, како и големиот технолошки напредок на моторите со согорување на водород, за кои тврди дека се подготвени за комерцијална употреба.
Хартунг предупредува дека политиката на потпирање исклучиво на електрични возила бара решавање на многу проблеми кои, како што вели, би можеле да се избегнат со поширок технолошки микс.
Хартунг истакнува дека без развој нема нови платформи за возила, а со тоа и напредни дигитални технологии. Тој додава дека овие два сегмента забрзано се развиваат во Кина, која бележи силен раст на производството на електрични автомобили.
Тој повика и на поголем оптимизам во европската индустрија, нагласувајќи дека иновациите и инвестициите, освен пари, бараат ентузијазам и верба во успехот.
Додека многумина веруваат дека ЕУ е немоќна пред конкуренцијата од поевтините електрични автомобили од Азија и зголемениот протекционизам во САД по враќањето на Доналд Трамп во Белата куќа, Хартунг не се согласува.
„Силна Европа е најдобрата одбрана од протекционизмот и економската нестабилност. Не можете да се борите против слободната трговија со принудни мерки, но Европа може да стане посилна, поконкурентна и поотпорна – особено преку договор за помала регулатива и повеќе инвестиции“, рече тој.
Неговиот став доаѓа откако компанијата најави реорганизација на своето работење, што може да резултира со елиминација на околу 12.000 работни места. Bosch моментално вработува околу 417.000 луѓе ширум светот.
И покрај предизвиците, Bosch ја заврши минатата деловна година со добивка од 3,2 милијарди евра. Пред рецесијата во Германија, компанијата остваруваше близу 4 милијарди евра профит годишно, а реорганизацијата има за цел да се врати на тоа ниво на профитабилност.