Рускиот претседател Владимир Путин потпиша закон со кој им се забранува на странските банки да отвораат филијали во Русија, објавено е на сајтот на Кремљ.
Со законот се предвидува странските финансиски организации во Русија да можат да работат само преку своите ќерки – фирми и претставништва.
Ваквата забрана се воведува затоа што руските регулаторни органи не можат целосно да спроведат надзор врз филијалите на странските банки, бидејќи начинот на нивното функционирање не е под јурисдикција на Русија.
Забраната за отворање филијали на странски банки всушност веќе е во сила, бидејќи ниту една не е регистрирана, така што потпишувањето на законот е само потврда на постоечката состојба.
На рускиот пазар работат неколку ќерки – фирми на странски банки, како Unicredit и Raiffeisen Bank.
Претходно, Путин поднесе предлог закон до Парламентот со кој на функционерите им се забранува поседување на банкарски сметки и имот во странство. Со овој предлог закон им се забранува скоро на сите функционери, со исклучок на дипломатскиот и конзуларниот персонал, да отвораат и да имаат банкарски сметки во банки надвор од Русија. Во забраната ќе биде вклучено и поседување на хартии од вредност на странски компании. Предлогот се однесува и на жените на функционерите и малолетните деца.
Некои аналитичари на ова гледаа како чекор кон изолација на земјата.
