Шефот на германската компанија „Рајнметал“ изјави дека цените на тенковите, оклопните возила и артилериското оружје би можеле да паднат во наредните години и покрај големото зголемување на инвестициите во одбраната што го одлучија европските влади.
Спротивно на стравувањата дека зголемените буџети за одбрана би можеле да доведат до зголемување на цените и лоши придобивки за даночните обврзници, Армин Папергер изјави за „Фајненшл тајмс“ дека спротивното ќе се случи за најголемиот германски производител на оружје, бидејќи производството во голем обем и зголемената автоматизација на процесите ќе бидат добри за „Рајнметал“, но и за клиентите.
Тој истакна дека цената на муницијата веќе падна откако „Рајнметал“ го зголеми својот производствен капацитет десеткратно во последните три години како одговор на зголемената побарувачка.
Таквиот раст е многу потешко да се постигне со тенкови или оклопни возила, но Папергер верува дека во следните 12 месеци се очекуваат илјадници и илјадници нарачки за производи како што се возилата „Боксер“ и „Пума“ или тенкот „Леопард 2“. Патем, тој тенк го произведува француско-германската компанија KNDS, а куполата за топови од „Рајнметал“.
Според овие очекувања, нарачките за тенкови и оклопни возила би можеле да достигнат помеѓу 30 и 35 милијарди евра само во Германија.
До јуни следната година се очекуваат вкупни нови нарачки во износ од 80 милијарди евра, а книгата на нарачки моментално има вредност од 55 милијарди евра.
„Тоа се големи бројки“, истакнува Папергер.
Некои економисти изразија загриженост дека моменталната ситуација би можела да поттикне инфлација и прекумерно зголемување на цените во случајот со компаниите од одбранбениот сектор, но Папергер потсетува дека „Рајнметал“ не се одлучил за компензација на цените дури ни за време на неодамнешната висока инфлација.
Само оваа година, цената на акциите на „Рајнметал“ скокна за 159,3 проценти. На почетокот на годината беше 604 евра, а сега е 1.566 евра.
Во последните пет години, растот е 1.903 проценти. Имено, во август 2020 година, цената на акциите беше 78 евра.