Индустриското производство во еврозоната се зголеми во април за 0,1 процент во споредба со претходниот месец, што е под пазарните очекувања кои предвидуваа раст од 0,2 проценти.
На ниво на Европската унија, индустриското производство исто така се зголеми за 0,1 процент во споредба со март, објави Европскиот завод за статистика – Евростат.
Во март, индустриското производство се зголеми за 0,4 проценти во Еврозоната и за 0,8 проценти во ЕУ. На годишна основа, индустриското производство во април се зголеми за 0,3 проценти во Еврозоната и за 0,9 проценти во ЕУ.
Во Еврозоната, на месечна основа, производството на нетрајни производи за широка потрошувачка се зголеми за 1,7 проценти, трајни производи за широка потрошувачка за еден процент и меѓупроизводи за 0,8 проценти. Во исто време, производството на капитални производи се намали за 0,5 проценти, додека производството на енергија се намали за 0,4 проценти.
На ниво на ЕУ, производството на нетрајни производи за широка потрошувачка се зголеми за 0,9 проценти, а на меѓупроизводи за 0,7 проценти, додека производството на капитални производи се намали за 0,2 проценти, а производството на енергија и трајни производи за широка потрошувачка за по 0,1 процент.
Меѓу земјите-членки за кои беа достапни податоци, најголем месечен раст на индустриското производство е забележан во Малта, каде што изнесуваше 5,2 проценти, по што следуваат Шведска со 3,4 проценти и Холандија со 1,6 проценти.
Најголем месечен пад е регистриран во Бугарија, каде што производството се намали за 4,6 проценти, Грција со намалување од 3,5 проценти и Полска со намалување од 3,4 проценти.
Во споредба со април минатата година, производството во еврозоната се зголеми за 3,4 проценти во секторот капитални добра, за 1,6 проценти во енергијата и за 0,6 проценти во производството на меѓупроизводи.
Во исто време, производството на трајни потрошувачки добра се намали за четири проценти, додека производството на нетрајни потрошувачки добра се намали за 5,1 процент.
На ниво на Европската Унија, производството на капитални добра се зголеми за 3,4 проценти на годишна основа, производството на енергија за 1,5 проценти, а производството на меѓупроизводи за еден процент.
Од друга страна, производството на трајни производи за широка потрошувачка се намали за 3,7 проценти, додека производството на нетрајни производи за широка потрошувачка се намали за 3,1 процент.
Највисок годишен раст на индустриското производство е забележан во Данска, каде што изнесувал 12,2 проценти, по што следуваат Литванија со 7,4 проценти и Малта со 7,3 проценти.
Најголемо намалување на годишно ниво е регистрирано во Луксембург, каде што производството се намалило за 6,1 процент, како и во Бугарија и Ирска, кои забележале намалување од по 4,2 проценти, додека во Естонија, производството се намалило за 3,9 проценти.