Ребаланс на буџетот за 10-тина дена

59

Се прават последните консултации со министерствата и јавните институции околу ребалансот на Буџетот и тој се очекува да биде објавен многу наскоро. Вицепремиерот за економски прашања, координација на економските сектори и инвестиции, Фатмир Битиќи во интервју за МИА открива дека релабансот ќе биде во насока на поддршка на развојот и закрепнувањето.

“Мислам дека многу набргу, наредните 10-тина дена би требало да се случи. Нема да има премногу изненадувања. Стандардно тоа што го покажавме е дека домаќински се грижиме за јавните средства. Таму каде што навистина нема можност да се спроведат одредени проекти, ќе се скратат и ќе се алоцираат средствата. Секако може да се алоцираат и во сегментот на поддршка на стопанството затоа што одредени показатели покажуваат дека можеби ќе треба уште еден период да има мерки. Поддршката на стопанството повеќе ја гледам како поддршка за креирање на додадена вредност, а не само како давање на помош за справување со последици“, вели Битиќи за МИА.

Во интервјуто, вицепремиерот нагласува дека како Влада го менуваат пристапот на креирање на Буџетот и работат на тоа да имаме буџет произлезен од вистинските потреби.

“Треба одредено време и веројатно многу скоро за две до три години ќе дојдеме до начин на креирање на буџет кога ќе зборуваме за 100 процентно различен буџет од тоа што сме го имаме пред пет години. И тогаш нема да зборуваме за приоритетни и неприоритетни работи, туку за ургентни и помалку ургентни работи“, истакнува вицепремиерот Битиќи.

Интервентниот инвестициски план кој треба да се спроведе до 2027 година, ефектите од шесте пакети мерки, изградбата на фотонапонската електрана во Штип за која се разгледуваат можностите за финансирање и кои се очекувањата од анализата што ја работат надлежните институции за увозот на мазутот, се дел од темите за кои МИА разговараше со вицепремиерот Битиќи.

Тој се осврнува и на можностите што треба да им се дадат на младите за да ги развијат своите идеи и бизниси, притоа откривајќи дека две компании кои имаат изуми од вештачката интелигенција и високата технологија ќе бидат претставени на Дубаи експо.

Дел од разговорот се и најавите на Лидл за инвестиции во земјава, како и плановите на Владата во делот на странските инвестиции.

Фото: Pexels