Поплавниот бран од невидени размери што го погоди Непал во среда беше предизвикан од фактот што огромен дел од глечерот, широк околу 600 метри, се отцепи од планината Лангтанг Лирунг на северот од земјата, а во исто време беше предизвикано и огромно лизгање на земјиштето, покажаа сателитските анализи.
Според најновите бројки објавени од Би-Би-Си, повеќе од 600 луѓе загинаа, додека нешто повеќе од 2.420 луѓе се водат како исчезнати, вклучувајќи стотици странски туристи.
Според CNN, поројот се движел низ планинските долини на границата меѓу Непал и Кина. Поројот не бил само вода, туку бил полн со кал, песок, чакал и огромни карпи кои се движеле заедно како една течна маса.
Напорите за обнова на инфраструктурата на Непал по катастрофалните поплави би можеле да чинат најмалку пет милијарди долари.
„Не би ме изненадило ако конечните трошоци достигнат тоа ниво“, рече Бинод Чаудари, претседател на групацијата Чаудари, во интервју за Блумберг ТВ, пренесува The Business Times.
Не станува збор само за пари, туку и за времето потребно за реконструкција, а дополнителен проблем создаваат и тешките географски услови.
Групацијата Чаудари работи во 12 различни сектори, од преработка на храна и телекомуникации до инфраструктура и банкарство, и тие истакнуваат дека се соочуваат со огромен предизвик во процесот на закрепнување и рестартирање на економијата.
„Се соочуваме со целосен колапс“, рече Чаудари, нагласувајќи дека и електраните биле оштетени.