Мате Римац продолжува да ја зајакнува својата позиција во светот на луксузните автомобили. Сите 250 примероци од моделот Bugatti Tourbillon се веќе распродадени, и тоа пред производството на овој спектакуларен хиперавтомобил воопшто да започне.
Почетната цена изнесува неверојатни 3,8 милиони евра без данок, што го прави еден од најскапите сериски автомобили во светот, јавува 24sata.hr.
Tourbillon беше претставен во 2024 година како наследник на легендарниот Chiron, а станува збор за првото Bugatti во повеќе од две децении што го нема познатиот W16 мотор.
Во центарот на автомобилот се наоѓа атмосферски 8,3-литарски V16 мотор кој развива 1.000 коњски сили. Покрај него работат и три електрични мотори кои додаваат уште 800 коњски сили, па вкупната моќност на системот изнесува неверојатни 1.800 коњски сили.
Tourbillon од 0 до 100 km/h стигнува за само две секунди, до 200 km/h за помалку од пет секунди, а до 300 km/h за помалку од десет секунди. Со специјален клуч максималната брзина се искачува на дури 445 km/h.
Посебна приказна е внатрешноста. Наместо огромни дигитални екрани, возачот го пречекува раскошна аналогна интрумент-табла развиена и изработена со помош на експерти од швајцарската часовничарска индустрија. Таа се состои од повеќе од 600 делови изработени од титаниум, сафир и рубини, додека голем дел од модерната технологија е скриен со цел да се задржи класичниот изглед.
На почетокот на јули во Молсхајм беше отворен нов производствен погон, „La Manufacture“, наменет за технички најсложените фази од производството на Tourbillon. Новиот погон ќе му овозможи на Bugatti зголемување на капацитетот на околу 200 возила годишно.
Во април 2026 година, преку партнерство со инвестициски фондови, Римац презеде целосна контрола врз компанијата Bugatti Rimac по откупот на уделот на Porsche. Под негово раководство Bugatti се шири и надвор од автомобилската индустрија. Во Дубаи се развива луксузниот станбен проект „Bugatti Residences“, кој вклучува 171 стан и 11 пентхауси, со приватни базени, плажа, па дури и лифтови за автомобили.
А Tourbillon веќе покажа колку купувачите ѝ веруваат на новата ера на Bugatti – сите 250 планирани примероци се распродадени, иако производството сè уште не е започнато.