Русија најверојатно ќе го забрани „копањето“ и трговијата со криптовалути

17

Централната банка на Русија, третата по големина земја во светот за ископување криптовалути, предложи целосна забрана за користење и создавање на сите криптовалути во земјата.

Криптовалутите ги носат белезите на пирамидалната шема и го поткопуваат суверенитетот на монетарната политика, што претставува закана за финансискиот систем на Русија, се вели во извештајот на централната банка објавен во четвртокот.

„Потенцијалните ризици за финансиска стабилност поврзани со криптовалутите се многу повисоки за пазарите во развој, вклучително и Русија“, се вели во извештајот. „Тоа традиционално се должи на поголемата склоност кон штедење во девизи и недоволното ниво на финансиска писменост“.

Екстракцијата ѝ штети на зелената програма на земјата, ги загрозува резервите на енергија на Русија и ги влошува негативните ефекти од ширењето на криптовалутите, создавајќи стимулации за заобиколување на регулаторните обиди, според Банката на Русија.

Тврдата линија на централната банка против криптовалутите се совпаѓа со позицијата на моќните безбедносни служби на Русија, кои исто така поддржуваат целосна забрана за нивна употреба на домашниот пазар за да се спречи нивната употреба за финансирање на опозицијата во земјата, според два извори на Блумберг.

Федералната служба за безбедност (ФСБ) лобираше кај гувернерот Елвира Набиулин за целосна забрана, бидејќи плаќањата со криптовалути кои тешко може да се следат се повеќе се користат од Русите за да донираат на „несакани организации“, вклучително и медиумите означени како „странски агенти“.

Според нив, финансирањето на опозицијата и медиумите претставува незначителен дел од над 7 трилиони рубљи (92 милијарди долари) средства кои се чуваат во околу 17 милиони крипто новчаници во Русија. Сепак, безбедносните служби се загрижени дека проблемот расте, велат тие.

Банката на Русија долго време беше скептична кон криптовалутите и навести потреба од понатамошно регулирање. Во декември, Набиулина рече дека руската инфраструктура не треба да се користи за трговија со криптовалути.

Портпаролот на ФСБ не одговори на барањата за коментар.

„Што се однесува до ФСБ, Банката на Русија одамна рече дека сметаме дека ризиците од криптовалутите се високи“, рече Елисавета Данилова, шеф на одделот за финансиска стабилност на централната банка, на онлајн брифингот во четвртокот. „Ова е нашиот став. Но, во исто време, ние сме среќни ако другите тела го споделуваат тоа“.

Русија е дом на просперитетна индустрија за ископување криптовалути која стана сè поважен центар откако Кина ги прогласи трансакциите со криптовалути незаконски и вети дека ќе го искорени ископувањето на дигитални средства.

Русија минатата година стана трет по големина крипто-рудар во светот, според Универзитетот во Кембриџ. Најголемите „рудници“ се наоѓаат во северниот дел на земјата и во Сибир, каде температурите се ниски, а достапна е евтина енергија. BitRiver, Minespot и BitCluster се меѓу најголемите компании во индустријата.

Русија веќе ја забрани употребата на криптовалути за плаќање, но законодавците го признаа постоењето на дигитални валути во законот од 2020 година, како што расте нивната популарност. За разлика од Кина, забраната нема да важи за средствата што Русите ги чуваат во странство, а оние со офшор банкарски сметки ќе можат да тргуваат со криптовалути.

Како што дебатата за криптовалутите се интензивира во Русија, претседателот на Долниот дом, Вјачеслав Володин, оваа недела рече дека создавањето регулаторна рамка ќе биде приоритет на пролетната сесија на Државната дума. Секоја забрана мора прво да се донесе со закон, пред да стапи во сила, истакна тој.