Москва објави дека руската влада вовела забрана за извоз на авијациско гориво, која ќе биде на сила до 30 ноември. Во официјалното соопштение се наведува дека целта на оваа драстична мерка е да се обезбеди стабилност на домашниот пазар на гориво, кој се соочува со зголемен притисок.
Одлуката доаѓа во време кога Русија се справува со последиците од континуираните украински напади врз нејзините рафинерии и клучната енергетска инфраструктура, што доведе до намалено производство и страв од недостиг во земјата. Забраната е најновата во низата потези на Кремљ за заштита на домашните резерви на енергија во услови на воено време и зголемена побарувачка, објави Ројтерс.
Вистинската причина зад оваа одлука лежи во сè поефикасните украински напади со беспилотни летала кои систематски ги таргетираат руските капацитети за преработка на нафта од почетокот на годината.
Нападите погодија голем број големи рафинерии низ целата земја, принудувајќи многу од нив да го намалат или целосно да го запрат производството. Според некои проценки, руското производство на гориво падна на најниско ниво во последните шеснаесет години, а нападите загрозија значителен дел од вкупниот капацитет за преработка, пренесува Пословни.хр.
Ситуацијата е дополнително комплицирана од западните санкции кои го ограничуваат пристапот на Русија до странска опрема и технологија, како резултат на што поправките на оштетените постројки би можеле да траат со месеци и со тоа да го продолжат периодот на намалено производство.
Забраната за извоз на авијациско гориво следува по претходно воведените ограничувања за извоз на бензин, кои се во сила од 1 април. Двете мерки јасно укажуваат на напорите на руските власти да спречат недостиг и да го ограничат растот на цените на домашниот пазар, особено пред летната сезона кога побарувачката за гориво традиционално се зголемува поради туризмот и земјоделските работи.
Според извештаите на новинската агенција Интерфакс, властите размислуваат и за воведување слични мерки за извоз на дизел. Производството на дизел во Русија се намали за околу десет проценти во мај, што следеше по падот од десет проценти во април, покажуваат податоците. И покрај падот на производството, извозот на дизел дури и се зголеми во истиот период, што создава дополнителен притисок врз домашните залихи.
Иако Русија е еден од најголемите извозници на нафтени производи во светот, нејзиниот удел на глобалниот пазар на авионско гориво е релативно мал, па затоа не се очекува оваа забрана да предизвика големи глобални нарушувања. Русија главно го извезува своето авијациско гориво по железница во земјите од Централна Азија, како што се Казахстан, Киргистан, Таџикистан и Узбекистан.
