Дигиталната банка Tinkoff е една од најуспешните банки во Русија, но по инвазијата на земјата во Украина и последователните санкции, нејзините акции пропаднаа. Имаше пад од 90% на цената на акцијата на банката и сериозен пад на богатството на нејзиниот основач Олег Тинков.
Тинков стана еден од најбогатите луѓе во Русија. Пред да ја основа банката, тој се занимавал со продажба на пиво и кнедли. Неговото богатство падна за повеќе од 5 милијарди долари за помалку од еден месец.
Тинков е еден од првите 10 поранешни руски милијардери кои отпаднаа од клубот на супербогати како резултат на поевтинувањето на руските акции и рекордниот пад на рубљата во однос на доларот поради санкциите и изолацијата на Русија од Западот.
„Форбс“ проценува дека богатството на Тинков се намалило на околу 800 милиони долари. Пазарната капитализација на Tinkoff Bank падна од 23 милијарди долари во ноември на нешто повеќе од 1 милијарда долари во вторникот.
Ова им се случи и на други компании. Акциите на „Лукоил“, најголемиот независен руски производител на нафта, основан од милијардерот Вагит Алекперов, исто така паднаа за речиси 93 отсто.
Иако неговото богатство е намалено, поранешниот милијардер сè уште поседува луксузни вили во Калифорнија и скијачки колиби на француските Алпи, како и Dassault Falcon 7X, иако сите руски летови се веќе забранети во британскиот, европскиот и американскиот воздушен простор.
Тинков, кој во минатото се фалеше со своите врски со Путин, е еден од ретките супербогати луѓе во Русија кои зборуваат за војната. Тој повика на прекин на „специјалната воена операција“ во Украина.
„Невини луѓе умираат секој ден во Украина, тоа е незамисливо и неприфатливо! Државите мора да трошат пари за лекување луѓе, за истражување, за наоѓање лекови, а не за војни“, напиша тој.
