На Скопски саем започнуваат подготовките за 14-от Меѓународен саем на градежништво, градежни материјали и градежна механизација и седмиот RealExpo – Меѓународен саем на недвижности, којшто од година во година забележува сè поголем интерес кај граѓаните. Саемите ќе траат од 28.02.2017 (вторник) до 04.03.2017 (сабота).
Меѓународниот саем на градежништво, градежни материјали и градежна механизација, претставува значајна специјализирана манифестација, којашто подразбира сестрана промоција на оваа стопанска гранка на производителите од Македонија и од странство. Во рамките на Саемот на градежништво 2017, во Метрополис Арената и оваа година ќе се одржи Саемот за недвижности и инвестиции – RealExpo. На саемот ќе се нудат и продаваат производи и услуги за работа, одржување, модернизирање, реновирање и опремување објекти. Најголема заинтересираност од граѓаните се очекува од Саемот за недвижности и инвестиции – RealExpo, каде посетителите најчесто се задржуваат на понудата на станови и куќи во Република Македонија.
За време на саемот, експерти од областа на енергетската ефикасност ќе ги презентираат мерките и придобивките од воведување на системи и методи за енергетска заштеда. Енергетската ефикасност полека станува значаен дел од градежната индустрија и заинтересираните граѓани за време на саемот ќе ја имаат можноста да се запознаат со најдобрите начини за заштеда на енергија во објектите.
