Јужнокорејскиот електронски гигант „Самсунг“ и синдикатот не успеаја да постигнат договор за платите, што го зголеми ризикот од масовен штрајк што би можел да влијае на производството на чипови, а со тоа и на целата јужнокорејска економија, пренесува Хина.
Застојот во преговорите следеше по дводневните маратонски разговори со посредство на локалната самоуправа.
Премиерот Ким Мин-сеок свика итен состанок на министрите и рече дека ситуацијата мора внимателно да се управува поради можното влијание врз националната економија. Тој, исто така, повика на продолжување на дијалогот меѓу менаџментот и синдикатот со цел да се избегне штрајк по секоја цена.
Акциите на Самсунг, најголемиот светски производител на мемориски чипови и важен снабдувач на индустријата за вештачка интелигенција, паднаа за дури 6 проценти за време на тргувањето на јужнокорејската берза, уништувајќи повеќе од 66 милијарди долари од пазарната вредност на компанијата, но ги намалија загубите на 0,7 проценти по веста за итен состанок на министрите.
Синдикатот, незадоволен од големата разлика во бонусите за работниците во споредба со конкурентот SK Hynix, се закани со 18-дневен штрајк од 21 мај доколку барањата на работниците не бидат прифатени. Повеќе од 50.000 вработени би можеле да штрајкуваат, што би можело да предизвика доцнење во испораките и дополнително да ги зголеми цените на чиповите.
Синдикалниот претставник Чои Сеунг-хо изјави дека Самсунг не одговорил на ниту едно од клучните барања и додаде дека синдикатот во моментов не планира да продолжи со преговорите освен ако компанијата не даде „сериозен предлог“.
Барањата на синдикатот се фокусираат на зголемување на платите од седум проценти и на системот за бонуси базиран на перформанси на Самсунг. Синдикатот наводно бара Самсунг да издвои 15 проценти од својата оперативна добивка за работниците како бонуси за перформанси, да ги укине ограничувањата за исплати на бонуси и да ја формализира структурата на бонуси. Менаџментот на Самсунг понудил да издвои 10 проценти од оперативната добивка за бонуси и да обезбеди еднократен пакет за посебна компензација, според јужнокорејската новинска агенција Јонхап.