Саудиска Арабија сè уште ја разгледува поканата за приклучување кон блокот на држави во развој (БРИКС), откако групата побара од неа да се приклучи минатата година, изјавија за Ројтерс два извори со директно знаење за ова прашање, додека новата министерка за надворешни работи на Аргентина, Дијана Мондино, рече дека нејзината земја нема да се приклучи на БРИКС и покрај тоа што е поканета да го стори тоа.
Во август, групата ги покани Саудиска Арабија, Обединетите Арапски Емирати, Египет, Иран, Аргентина и Етиопија да се приклучат почнувајќи од 1 јануари 2024 година.
Два извори рекоа дека 1 јануари не е краен рок за донесување одлука, а еден додаде дека приклучувањето кон блокот ќе има големи придобивки бидејќи членките Кина и Индија се најголемите трговски партнери на кралството.
Саудиска Арабија ги проценува придобивките и потоа ќе донесат одлука, процесот е во тек“, изјави еден од изворите.
Подолго размислување во Ријад
Проширувањето на групата ќе додаде економско значење на БРИКС, чии сегашни членки се Кина, Бразил, Русија, Индија и Јужна Африка. Проширувањето на нови членки, исто така, може да ја поттикне декларираната амбиција на блокот да стане шампион на глобалниот југ.
Фајсал Алибрахим, министерот за економија на Саудиска Арабија, подоцна потврди дека кралството сè уште е во процес на донесување одлука за приклучување кон блокот.
„Кралството е дел од бројни мултилатерални платформи и институции и секогаш кога кралството е покането на една од нив, тоа поминува низ процес од повеќе чекори, а на крајот се донесува одлука“, изјави Алибрахим за Ројтерс. „Во моментов сме во сличен процес и ќе го коментирам на крајот.
Кремљ во петокот рече дека жали поради одлуката на Аргентина да не се приклучи на блокот и се надева дека Буенос Аирес ќе ја преиспита.