Најголемата руска банка Сбербанк во вторникот соопшти дека работи нормално и покрај тоа што е исклучена од меѓународниот меѓубанкарски систем SWIFT, дел од новиот пакет санкции на ЕУ против Русија поради нејзиниот напад врз Украина.
„Сбербанк работи вообичаено, а исклучувањето од меѓународниот меѓубанкарски систем за пренос на информации и плаќање SWIFT не ја менува моменталната состојба со меѓународните трансакции, соопшти прес-службата на Сбербанк, пренесе РИА Новости.
Исклучувањето на Сбербанк од SWIFT е договорено како дел од шестиот пакет санкции на ЕУ.
Пакетот вклучува забрана за увоз на руска нафта испорачана со бродови и забрана за емитување на три руски телевизии.
Беше донесена и одлука за санкционирање на лица одговорни за воени злосторства.
Во почетокот на март, Европската унија, исто така, одлучи да ги исклучи VTB, Rossia, Otkritie, Novikombank, Promsvjazbank, Sovcombank и државната корпорација VEB од SWIFT.
Повеќе од 11.000 банки во речиси сите земји во светот се поврзани со SWIFT. Русија има свој систем за финансиски пораки, создаден од нејзината централна банка како одговор на ризиците од можно исклучување на руските банки од SWIFT.
