Се чини дека краткорочното приватно сместување во туристичките дестинации и големите градови полека почнува да ја губи битката за привилегирана позиција во однос на хотелите, било во однос на оданочувањето или во однос на другите деловни услови на пазарот.
Заедно со тоа што планира значително да ја зголеми туристичката такса за престој во хотели, Грција ќе воведе и обврска за плаќање на ДДВ и други давачки што ги плаќаат хотелите и за сите оние што ќе изнајмат повеќе од три објекти на туристите.
Грчкиот премиер Киријакос Мицотакис минатиот викенд најави значително зголемување на туристичката такса за хотелите, а тие пари ќе одат во фондот за борба против последиците од климатските промени, пренесува Бизнис.рс.
Владата веќе создаде посебна резерва за елементарни непогоди од 300 милиони евра, која од 2024 година ќе достигне 600 милиони евра, благодарение на дополнителните 300 милиони евра од данокот за престој, кој ќе се зголеми на максимални шест евра.
Туристичката такса во моментов е 50 центи во хотели со една и две ѕвезди, 1,50 евра во хотели со три ѕвездички, три евра во хотели со четири ѕвездички и четири евра во хотели со пет ѕвезди.