Американската министерка за финансии Џенет Јелен предвиде значително намалување на инфлацијата во САД во 2023 година, освен ако не дојде до нов неочекуван шок.
„Верувам дека до крајот на следната година ќе видиме многу помала инфлација ако нема… неочекуван шок“, изјави таа за познатата емисија „60 минути“ на CBS во интервју објавено во неделата.
Запрашана за веројатноста за рецесија, поранешната претседателка на Федералните резерви рече дека „постои ризик од рецесија, но тоа секако, според мене, не е нешто што е неопходно за намалување на инфлацијата“, пренесе Ројтерс.
Коментарите на Џенет Јелен дојдоа неколку дена пред очекуваното забавување на зголемувањето на каматните стапки од страна на ФЕД. Претседателот на ФЕД Џером Пауел предложи ново зголемување на референтната каматна стапка за половина процентен поен, по четирите зголемувања од 75 базични поени оваа година.
Јелен изјави за CBS дека економскиот раст значително забавува, инфлацијата се намалува и се надева дека пазарот на трудот ќе остане здрав.
Таа рече дека се надева дека скокот на инфлацијата забележан оваа година ќе биде краткотраен и рече дека американската влада научила „многу лекции“ за потребата да се намали инфлацијата по високите цени забележани во 1970-тите.
