Она што беше најавено во автомобилската индустрија се случува, но побрзо од проценките. Имено, цените на батериите забрзано паѓаат, што ги намалува и цените на електричните автомобили. Факторите кои го поттикнуваат падот на цените на батериските ќелии од 51 отсто вклучуваат пад на цените на суровините како што е литиумот и помалата побарувачка за електрични автомобили од очекуваното. Резултатот веќе се чувствува во Кина – електричните автомобили сега имаат цени на ниво на автомобили на бензин или дури и пониски од нив, а значително намалување на цените на електричните автомобили оди и на европскиот континент. Имено, многу поевтини електрични автомобили ќе се појават на пазарот во 2025 и 2026 година.
Глобалната побарувачка за литиум-јонски батерии во 2023 година неодамна беше проценета на приближно 950 гигават часови, додека глобалниот производствен капацитет, претежно во Кина, е двојно повеќе од таа бројка. Напорите на Запад да се развие капацитет за производство на батерии за да се совпадне со Кина само ќе го влоши проблемот со прекумерниот капацитет, предвидуваат аналитичарите.
Ова е добра вест за потрошувачите, пренесува BloombergNEF, кој пресметува дека пониските цени ќе се одразат на поевтините модели на електрични автомобили чие производство е планирано за следните неколку години.
Иако вообичаено се смета дека пониските цени за електричните возила ја зголемуваат побарувачката и затоа доведуваат до закрепнување на глобалните цени на батериите, анализата на Блумберг сугерира дека постојат и други фактори кои упатуваат на пониски цени за некое време. Најважно, сметаат тие, е фактот што кинеските компании и другите производители продолжуваат да инвестираат големи суми во истражување и развој, автоматизирано производство и нови фабрики. BNEF вели дека очекува ниските цени да опстојат барем во следните неколку години, пренесува Пословни.хр.
