Ако ви изгледа како обична естетика, нијансата на вашата патна исправа воопшто не е случајна. Таа е тивок дипломатски сигнал што ја открива геополитичката припадност, религиозното наследство или географската положба на вашата земја.
Ова се тајните што ги носат боите на пасошите со себе, а кои веројатно не сте ги забележале додека брзавте да го фатите летот.
Геополитика на дланка – црвена и сина
Најчестата боја во светот е секако црвената, или поточно нејзината потемна, бордо нијанса. Ако имате пасош од оваа боја, веројатно доаѓате од земја која е членка на Европската Унија или сака да стане.
Земји како Турција, Албанија и Македонија ги сменија своите стари корици во бордо токму како симбол на аспирациите кон интеграција во ЕУ. Од друга страна, боите на пасошите во црвениот спектар можат да укажуваат и на комунистичкото минато на една нација, што е случај со Кина или Русија.
Наспроти Стариот континент стои сината боја, која често се нарекува боја на „Новиот свет“. Оваа боја најчесто ја користат земјите од Северна и Јужна Америка, како и земјите од Карибите. Интересно е што Соединетите Американски Држави не секогаш имале сини пасоши.
Низ историјата, тие користеле и црвена и зелена, пред да ја стандардизираат темно сината во 1976 година за да одговара на нијансата на американското знаме, пишува Каматица.
За многу земји, религијата игра клучна улога во брендирањето на нацијата. Зелената е доминантна боја во исламскиот свет бидејќи се смета за омилена боја на пророкот Мухамед, а во исто време ја симболизира природата и животот.
Затоа ќе забележите дека боите на пасошите на земји како Саудиска Арабија, Пакистан или Мароко се токму во овие тонови.
Најретката од сите е црната. Иако изгледа исклучително елегантна и официјална, ја користат мал број земји. Некои африкански нации, како што се Боцвана и Замбија, се одлучиле за црна, но таа е најпозната како заштитен знак на Нов Зеланд, каде што црната е национална боја.
Покрај естетиката, темните бои на пасошите, без разлика дали се црни или темно сини, имаат и практична намена – покажуваат помалку оштетувања и нечистотија, што е важно за документ кој треба да трае една деценија.