Европската банкарска индустрија го издржа предизвикот од кризата предизвикана во март, изјави главниот извршен директор на Дојче банк, Кристијан Зевинг.
„Изминатите неколку недели беа тест за европската финансиска индустрија – но ние добро се справивме со тоа“, рече Зевинг на прес-конференција во понеделникот, говорејќи во улога на шеф на германското банкарско тело BDB.
Тој рече дека финансиската индустрија е зајакната со нејзините „профитабилни и робусни банки“, како и регулаторниот и надзорниот систем на Европската унија (ЕУ), кој беше зајакнат по глобалната финансиска криза.
Европските банки се соочија со стравувањата на инвеститорите од “зараза“ минатиот месец, откако неколку кредитори во САД и Швајцарија – вклучително и Credit Suisse – пропаднаа. Неколку дена подоцна, Дојче банк беше во центарот на вниманието поради трошоците за преземање на нејзините обврзници, кои потоа привремено се зголемија.
Настаните околу банките ги вознемирија регулаторите, кои сега размислуваат како да ја прилагодат регулативата за да не се случуваат слични турбуленции во иднина. Зевинг во својот говор рече дека европската регулатива функционирала добро во минатото и е генерално построга отколку во САД.
Германскиот министер за финансии Кристијан Линднер рече дека нема системска финансиска или банкарска криза и дека секоја контрола треба да биде насочена кон индивидуалните заемодавци.
„Затоа заклучоците од оваа ситуација треба да се фокусираат на поединечни институции, а не на секторот како целина“, рече Линднер.
„Финансиските институции треба да вложат напори да ја подобрат својата конкурентност, а централните банки не треба да ги земаат предвид банките при одлучувањето за монетарната политика, бидејќи стабилноста на цените треба да биде приоритет“, рече Линднер.
