Отворањето на Јапонија за туристи и зголемената побарувачка за деловни патувања ќе го поддржат растот во авио-секторот следната година, иако војната во Украина, инфлацијата и рецесијата би можеле да го забават нејзиното темпо, изјави извршниот директор на Луфтханза, Карстен Спор.
„Нема причина за песимизам“, рече тој.
Тој, исто така, очекува постепено отворање на Кина по конгресот на Комунистичката партија што започнува во недела. Коментарите на Спор уследија по оптимистичките оценки на IAG, сопственик на British Airways, и водечки европски авиопревозници со дисконтни цени Ryanair и easyJet, кои оваа недела изјавија дека побарувачката за патувања не е ослабена.
Аеродромот во Франкфурт се подготвува за тешка зима
Загриженоста се зголеми поради зголемените сметки за домаќинствата кои оставаат малку простор за патување. „Луфтханза“ очекува следната година да достигне 87 отсто од капацитетот пред пандемијата, по овогодинешните 75 отсто, рече Спор, додавајќи дека моментално околу 86 отсто од местата се пополнети.
Тој, исто така, ја истакна зголемената побарувачка за деловни патувања, по паузата од пандемијата, бидејќи тешкотиите во синџирот на снабдување ги принудуваат компаниите да бараат нови добавувачи. „Конечно ја оставивме кризата зад нас, по две и пол години“, заклучи Спор, пренесува tportal.