Швајцарија ја зајакнува контролата над странските инвеститори

37

Швајцарија предложи нов механизам за преглед и одобрување корпоративни преземања од странски земји или инвеститори поддржани од странство. Причината е притисокот од парламентот да го преиспита неограничениот пристап до сите компании во земјата, пренесуваат светските медиуми.

Владината изјава не прецизираше конкретни земји, но повиците за спречување на кинеските инвестиции се зголемија откако државната компанија „ChemChina“ ја купи швајцарската агрохемиска група „Syngenta“ во 2016 година за 43 милијарди долари.

„Главните закани најверојатно доаѓаат од инвеститори блиски до одредени земји. Односно, преземањата од странска земја или поврзани инвеститори во сите сектори мора да бидат пријавени и одобрени“, се вели во официјалната позиција на швајцарскиот кабинет.

Швајцарија долго време се противеше на контролата на инвестициите, тврдејќи дека политиката на отворени врати гарантира дека швајцарските компании ќе го добијат капиталот и искуството потребно за да напредуваат и да отворат работни места.

Владиниот предлог вели дека потенцијалните закани вклучуваат компании, кои може да не обезбедат неопходна услуга, зависност на швајцарската војска од добавувачи на оружје, јавна зависност од давателите на информатичка технологија, пристап на злонамерен учесник до чувствителни лични податоци или значителни нарушувања на конкуренцијата.

Швајцарија сепак ќе се обидува да ја задржи својата отвореност кон странските инвестиции и својата атрактивност како деловен центар, соопшти владата. Исто така, ќе се осигури дека инвестициските контроли се компатибилни со меѓународното право.