Технолошката компанија Макстил од средината на следниот месец, поточно од 12 до 15 јануари, ќе го стави во функција системот за отпрашување и ќе го започне производството во Челичарницата, што беше прекинато на крајот на октомври, истакна денеска Минчо Јорданов, претседател на одборот на директори на Макстил, пишува Миа.
И покрај потешкотиите, како што нагласи тој, Макстил продолжува со инвестиции со цел да се исполнат еколошките барања и прописи. Од почетокот на кризата во 2008 година, компанијата кумулативно остварила загуби од 46,5 милиони евра.
Генералниот директор, Иван Бановски, посочи дека и покрај минимизираното производство на контилеани флемани слабови и изнуденото максимизирање на производството на шест шаржи во Челичарницата, Макстил годинава произвел 187.991 тони што е за 6,4% повеќе од планираните 176.700 тони челичен полуфабрикат за 2014 година.
Макстил 30% од своето производство го извезува во Грција, по што следат САД со 10% до 15%, а остатокот на производството речиси подеднакво се извезува во останатите земји од Европската унија. Од неодамна Макстил е присутен и на пазарот во Турција каде извезува речиси 10% од своето производство.
