Spotify ја зголеми цената на претплатата за 200 милиони корисници

32

Spotify, глобалната платформа за слушање музика, одлучи да ги зголеми цените на претплатите за повеќе од 200 милиони корисници во категоријата Premium за прв пат по 10 години.

– Ги менуваме цените на услугите во категоријата Premium на многу пазари низ светот за да можеме да продолжиме со иновациите – се наведува во вчерашното соопштение на компанијата Spotify, пренесува Би-би-си.

Претплатниците во САД ќе плаќаат 10,99 долари месечно наместо претходните 9,99 долари, а претплатата на овој пакет услуги поскапе и во Велика Британија, Канада, Австралија и на 49 други пазари. Пакетот Premium duo ќе се зголеми во цената на 14,99 долари во САД, како и пакетот Family plan – на 16,99 долари и студентскиот план – на 5,99 долари месечно.

Spotify рече дека корисниците ќе имаат еден месец грејс период пред да стапат на сила новите цени и ќе имаат можност да ја откажат претплатата. Ваквото поскапување не е големо изненадување, бидејќи беше објавено од шефот на компанијата Spotify, Даниел Ек, уште во април.

– Кога ќе биде погоден моментот, ќе ги зголемиме цените, а нашите клиенти ќе го прифатат тоа бидејќи им нудиме многу квалитетни содржини – изјави тогаш Ек, потсетува Би-би-си.

Spotify ќе продолжи да нуди бесплатни содржини – со реклами. Корисниците на премиум пакети можат да уживаат во музика без комерцијална содржина.

Spotify има 515 милиони корисници на повеќе од 180 пазари ширум светот, а околу 40 отсто од нив се претплатници.

Компанијата отпушти шест отсто од својата работна сила во јануари, наведувајќи ја потребата од подобрување на ефикасноста.

Платформите Apple Music, Peacock, Netflix, Max и Paramount+, исто така, неодамна ги зголемија цените на претплатата, според Би-Би-Си.