Square, платежна компанија водена од ко-основачот на Twitter, Џек Дорси, најави промена на името во Block, откако се обидува да го прошири својот платен бизнис кон нови технологии како што е блокчејн, пренесе Ројтерс.
Компанијата со седиште во Сан Франциско вели дека поранешното име на Square станало синоним за нејзиниот бизнис со малопродажба, а новото име Block ќе го разликува корпоративниот ентитет од неговиот бизнис. Според британската агенција, ова е стратегија слична на ребрендирањето на Facebook во Meta Platforms минатиот месец.
Од Square потврдија дека нема да има организациски промени и дека различни деловни единици – Square, услугата за плаќање peer-to-peer Cash App, услугата за стриминг музика Tidal, како и нејзиниот сегмент за финансиски услуги фокусирани на биткоин – ќе продолжат да ги одржуваат своите брендови.
Штом беше објавена оваа промена, акциите на компанијата пораснаа за речиси еден процент.
„Новото име има многу значење за компанијата – градежни блокови, населби и нивните локални бизниси, заедници кои се собираат на забави полни со музика, блокчејн, дел од кодот и пречки што треба да се надминат“, се вели во соопштението на компанијата.
Ваквиот потег дојде неколку дена откако Дорси се повлече од функцијата извршен директор на Twitter.
Дорси е ко-основач на Square од 2009 година со акцент на личните плаќања и неговиот истоимен читач на картички, кој им овозможува на луѓето да прифаќаат плаќања со кредитни картички на паметен телефон.
Новото име ќе стапи на сила на 10 декември, соопшти Square, истакнувајќи дека ознаката SQ на Њујоршката берза во овој момент нема да се промени.
