Србија има убедливо најголеми резерви на злато на Западен Балкан. Македонија е втора на Западен Балкан со седум тони злато, потоа Албанија со 3,5 тони, Словенија со 3,1 тони, Црна Гора со 1,9 тони и Босна и Херцеговина со 1,5 тони.
Во текот на оваа година златото речиси секој месец бележеше нов ценовен рекорд. Како што велат експертите, во сегашното економско опкружување, каде што економскиот раст е нестабилен, а повеќето економии се опоравуваат од рекордната инфлација, златото стана многу атрактивна инвестиција. И за централните банки и за граѓаните. Растат државните резерви, а паралелно и златните „сламарици“, пишува Бизнис.рс.
Цената на златото и интензивниот раст од претходните месеци се поттикнати од најголемите пазари. Како што покажува статистиката, на светската сцена на жолт метал во моментов најголеми играчи се Кина, Индија и САД.
Секоја година кинескиот пазар расте за околу 984 тони злато! Покрај тоа, Народната банка на Кина е исто така огромен купувач на овој благороден метал. Во изминатите три години оваа институција откупила околу 300 тони.
„Ако во иднина Кина продолжи со ова темпо, ќе престигне многу западни земји како Италија или Франција по златни резерви“, вели Георги Христов од Tavex zlato&srebro и додава дека „кога станува збор за побарувачката на злато, ова земјата го држи апсолутното прво место, произведува и купува најмногу злато. На златото во Кина се гледа како на традиционална и стабилна инвестиција и како на незаменлив подарок на сите свечености. Тоа е толку популарна инвестиција што дури и многу кинески комерцијални банки нудат да купат злато на лице место или преку банкарска сметка. Исто така, Кина е голем производител, па се купува многу злато и за индустриски цели“.
Според последните информации од јули 2024 година, Народната банка на Србија купила дополнителни пет тони злато во вредност од 350 милиони евра, со што златните резерви се околу 47 тони злато во вредност од речиси четири милијарди долари.
„Ова е неверојатен скок, особено ако се земе предвид дека Србија на почетокот на 2012 година имала околу 15 тони злато и дека за една деценија тројно ги зголемила своите златни резерви. Скокот на цената на инвестициското злато во изминатите 10 години докажува дека оваа инвестиција навистина и се исплатеше на Народната банка на Србија“, вели Христов.
Србија има убедливо најголеми резерви на злато на Западен Балкан, дури и повеќе од двојно од резервите на сите други земји заедно. Македонија е втора на Западен Балкан со седум тони злато, потоа Албанија со 3,5 тони, Словенија со 3,1 тони, Црна Гора со 1,9 тони и Босна и Херцеговина со 1,5 тони.
