Во октомври, поради негативните ефекти од сушата, нивото на инфлација е малку повисоко од очекуваното и изнесува 4,5 отсто, изјави гувернерката на Народната банка на Србија (НБС), Јоргованка Табаковиќ на презентацијата на Извештајот за инфлација.
Ефектите од сушата се посилни кога се во прашање цените на овошјето и зеленчукот, додека домашната побарувачка придонесе и за забрзување на растот на инфлацијата, но во наредниот период тоа треба да се компензира со пониските цени на нафтата и пониската „увезена“ инфлација во услови на побавно закрепнување во еврозоната, појасни Табаковиќ и посочи дека меѓугодишната инфлација на крајот на следната година треба да се приближи до централната проекција од три проценти.
Говорејќи за очекуваното движење на цените, гувернерката на НБС рече дека очекува да се намалат „некои неразумно покачени цени“, а испрати порака и до трговците.
„Не би сакаал трговците да и пркосат на власта со празнење на полиците бидејќи државата си ја врши работата борејќи се со картелизацијата.
Кога станува збор за економскиот раст, Народната банка на Србија не ги промени своите проценки за бруто домашниот производ (БДП).
„Проценуваме дека растот на БДП годинава ќе изнесува 3,8 отсто, а би бил уште поголем доколку нема негативни ефекти од сушата врз земјоделството и производството на електрична енергија“, рече Табаковиќ.
Таа додаде дека НБС очекува економскиот раст во следните две години да биде во опсег од четири до пет проценти, со централна проекција од 4,5 проценти.
„Верувам дека од наведеното јасно може да се заклучи дека го обезбедивме таканареченото меко приземјување на нашата економија по силните шокови од меѓународното опкружување и дека сега, во услови на намалени инфлациски притисоци и движење на инфлацијата во рамките на целните лимити, можеме да поддржиме поповолни услови и извори за раст на кредитните активности и со тоа да обезбедиме дополнителна поддршка за економскиот раст“, нагласи Табаковиќ.
На презентацијата на Ноемврискиот извештај за инфлацијата, гувернерката презентираше прелиминарна информација дека приливот на странски директни инвестиции достигнал вредност од 3,9 милијарди евра за 10 месеци, односно од почетокот на годината до крајот на октомври.
