Средба на Пендаровски со Мајк Зафировски и претставници на „Македонија 2025″

34

Претседателот Пендаровски денеска го прими Мајк Зафировски, ко-основач на „Македонија 2025″, заедно со претставници на организацијата.

На средбата се разговараше за заклучоците и за првичните реакции од 11-то издание на самитот на „Македонија 2025″, на кое годинава во фокусот беа забрзаната дигитална трансформација, регионалната соработка и иновациите.

Претседателот Пендаровски му се заблагодари на Мајк Зафировски и на останатите членови на „Македонија 2025″ за нивниот ангажман за придонес кон македонската економија, поттикнувајќи нови генерации на бизнис лидери, неопходни за развојот и иднината на Северна Македонија.

Соговорниците на средбата изразија уверување дека „Македонија 2025″, заедно со државните институции, со граѓанскиот сектор, академската и бизнис заедница можат да придонесат за надминување на современите економски предизвици во нашата држава.

На средбата, претседателот Пендаровски му го врачи македонското државјанство на Мајк Зафировски. Зафировски е успешен светски бизнисмен, со македонско потекло кој живее и работи во САД. Заедно со други бизнисмени од дијаспората е основач на организацијата „Македонија 2025″, која има цел да го поттикнува економскиот развој и привлекувањето на странските инвеститори во Северна Македонија.