Нето странските директни инвестиции (СДИ) во Србија во текот на осумте месеци од оваа година изнесуваа 1,49 милијарди евра и се за 54 проценти помалку во споредба со истиот период минатата година, според документацијата објавена од Народната банка на Србија (НБС).
Вкупните странски директни инвестиции во Србија за осум месеци изнесуваа 2,3 милијарди евра, но нето резултатот се добива кога ќе се одземат инвестициите на српските жители во странство, пишува „Nova ekonomija“ во својата анализа.
Според прелиминарните податоци за првата половина од 2025 година, најголемите инвестиции се регистрирани во преработувачката индустрија (23,9 проценти), професионалните, научните, иновативните и техничките активности (18,9 проценти), градежништвото (15,6 проценти), трговијата на големо и мало (14,5 проценти).
Инвеститорите беа претежно од ЕУ (68,6 проценти од вкупните инвестиции) и други европски земји (16,4 проценти), САД (4,1 процент) и Обединетите Арапски Емирати (3,7 проценти).
Тогаш, како што може да се види од објавената документација, нето портфолио инвестициите изнесуваа 709 милиони евра.
Портфолио инвестициите претставуваат инвестиции во акции или должнички хартии од вредност. Овој резултат е многу повисок отколку во истиот период од претходната година, кога овие инвестиции изнесуваа негативни 192 милиони евра.
Претставниците на властите во Србија, ги обвинија студентските блокади и протести, кои траат речиси една година, од падот на настрешницата на железничката станица во Нови Сад, кога загинаа 16 лица, за падот на странските директни инвестиции.
НБС во август изјави дека натпросечните еднократни приливи минатата година, како и намалената доверба на инвеститорите на глобално ниво, придонеле за падот.