Студенти од Академијата за графички дизајн од Семос Едукација изработија креативни постери со пораки за емпатија, поддршка и солидарност кон лицата со мултипла склероза, по повод Светскиот ден на мултипла склероза. Иницијативата е реализирана во соработка со Националното здружение за помош и поддршка на лица со мултипла склероза, со цел да се придонесе кон подигнување на јавната свест за оваа состојба и намалување на стигмата.
Проектот го реализираа студентите од генерацијата 2024/25 на Академијата за графички дизајн, а под менторство на професорката Даниела Спасева, во рамки на предмет посветен на општествено одговорни практики. Преку истражување и визуелна интерпретација на темата, студентите создадоа постери и дизајнерски решенија што испраќаат пораки за разбирање, поддршка и поголема видливост на лицата кои живеат со мултипла склероза.
„Особено сме горди кога студентската креативност добива вистинска општествена вредност. Овој проект покажа дека дизајнот не е само визуелна комуникација, туку и моќна алатка за отворање важни теми, рушење предрасуди и поттикнување емпатија. Благодарни сме на Националното здружение за мултипла склероза за довербата и можноста студентите преку својата работа да придонесат кон иницијатива што носи силна порака за поддршка и солидарност“, изјави Ангелина Канчевска – раководител на Академијата за графички и веб дизајн.
Постерите беа претставени на настан одржан во Europe House во Скопје, каде беше прикажано и видео со студентските решенија, со истакнато авторство на секој дизајн.
Светскиот ден на мултипла склероза се одбележува секоја година со цел подигнување на јавната свест, намалување на стигмата и поттикнување подобар пристап до навремена дијагностика, терапија и поддршка за пациентите.
По повод овој ден, Семос Едукација на Националното здружение за помош и поддршка на лица со мултипла склероза им го додели признанието „SEMOS ACADEMY AWARDS“ – за најдобар партнер на студентски проект од областа на општествено одговорни практики.
Со оваа иницијатива, Семос Едукација како акредитирана институција за пост-средно формално образование, ја продолжува својата поддршка на проекти што ги поврзуваат едукацијата, креативноста и општествената одговорност.