Светската економија ризикува да изгуби 4.500 милијарди долари поради високо заразните варијанти на коронавирусот кои се шират во сиромашните земји, каде што стапките на вакцинација се пониски, предупреди во вторникот Меѓународниот монетарен фонд (ММФ).
Повикувајќи ги богатите земји да преземат итни мерки за дистрибуција на најмалку една милијарда дози вакцини на земјите во развој или да ризикуваат сериозни економски последици, фондот со седиште во Вашингтон рече дека јазот меѓу богатите и сиромашните економии се продлабочува за време на пандемијата, пренесува Guardian. ММФ предупреди на натамошно влошување следната година.
Брзото воведување на масовна вакцинација ги подобри економските перспективи во побогатите земји, додека недостатокот на ресурси за подобрување на стапките на вакцинација во земјите со ниски примања го намали повторното отворање на нивните економии и изгледите за економски раст.
Најновиот предлог на ММФ за ставање крај на пандемијата има за цел вакцинирање на најмалку 40% од населението во сите земји до крајот на 2021 година и најмалку 60% до средината на 2022 година. Пресметката покажа дека тоа ќе чини 50 милијарди долари.
Фото: Pixabay
