Економскиот раст на регионот на Западен Балкан малку ќе забави во 2025 година поради послабата надворешна побарувачка и економската неизвесност предизвикана од понатамошниот развој на глобалните трговски политики, но ќе остане стабилен, според проекциите на Светската банка во Редовниот економски извештај за Западен Балкан објавен денес.
Светската банка предвидува дека вкупната стапка на економски раст на Западен Балкан ќе достигне 3,2 проценти во 2025 година, што претставува надолна ревизија од 0,5 процентни поени во споредба со претходните проекции, додека се очекува растот да се забрза на 3,5 проценти во 2026 година.
„Забележуваме некои позитивни економски трендови во Западен Балкан кои укажуваат на отпорноста на регионот и треба да претставуваат основа за солиден економски раст. Пониската инфлација и растот на платите ја охрабруваат потрошувачката, а јавните инвестиции исто така почнуваат да растат“, рече Шаокинг Ју, директор на Одделот за Западен Балкан на Светската банка.