Светското првенство значително влијае на работните навики на вработените во Соединетите Американски Држави, бидејќи голем број работници пропуштиле работа или работеле надвор од канцеларијата за да ги гледаат натпреварите, според анализа објавена од Envoy.
Бројот на пристигнувања на вработени во американските канцеларии се намалил за 26 проценти во споредба со просечната вредност на 7 јули, денот откако репрезентацијата на Соединетите Американски Држави загуби од Белгија, објавува Bloomberg.
Падот бил речиси десет пати поголем од денот по финалето на Супербоул во американски фудбал, еден од најгледаните спортски настани во САД.
Интересот за натпреварите од фудбалското првенство влијаеше врз продуктивноста на работата за време на самиот турнир.
На денот на натпреварот на американската репрезентација, бројот на пристигнувања во канцеларијата беше за 8,5 проценти помал од просечниот понеделник во текот на претходните три месеци.
Според UKG, која развива софтвер за управување со вработени, Светското првенство би можело да ја чини американската економија околу 11,7 милијарди долари во изгубена продуктивност, додека глобалните загуби би можеле да достигнат 17 милијарди долари.
Повеќе од една четвртина од американските работници планирале да работат доцна, да си одат дома порано или целосно да отсуствуваат од работа за време на фудбалскиот турнир за да ги гледаат 104-те натпревари од првенството.
Натпреварите што се играа во текот на работното време во Соединетите Американски Држави поради временската разлика беа посебен проблем.
Компаниите се обидоа да ги ублажат ефектите од фудбалската еуфорија, а некои работодавци, како што се банките JP Morgan Chase, Goldman Sachs и S&P, ги охрабрија вработените да работат од дома на деновите на натпреварите за да избегнат сообраќајни метежи и проблеми при одењето на работа.
Аналитичарите наведуваат дека спортските и културните настани традиционално влијаат врз продуктивноста на вработените.
Слични намалувања на посетеноста на работните места беа забележани за време на Олимписките игри.