Тесла планира да го зголеми производството во својата фабрика во Гринхајде во близина на Берлин во фискалната 2026 година, бидејќи побарувачката ќе се опорави и профитот ќе се подобри, според годишниот извештај на компанијата за нејзината германска производствена единица.
Компанијата очекува значително зголемување на обемот на производство во споредба со претходната година, соопшти „Тесла Манфуркшн Бранденбург СЕ“ во својот годишен извештај за 2025 година.
Таа изјави дека се очекува зголемување на искористеноста на капацитетите и дека фабриката ќе снабдува повеќе од 30 пазари, а во исто време ќе се прошири на дополнителни пазари.
Тесла претходно оваа година изјави дека има намера да го зголеми производството во Гринхајде на дури 7.500 возила неделно, или околу 375.000 годишно, а истовремено да го прошири производството на батерии.
Компанијата планира да создаде 3.500 нови работни места и вели дека има намера да го интегрира целиот вредносен синџир од батерии до готови возила на локацијата.
Геополитичките ризици би можеле да влијаат на проширувањето
Тесла рече дека проширувањето останува предмет на економски услови и предупреди дека ескалацијата на геополитичките тензии и потенцијалните нарушувања на синџирот на снабдување би можеле да влијаат на нејзините перспективи.
Таа, исто така, рече дека плановите за целосно производство на батерии во Гринхајде зависат од пазарните услови, наведувајќи ги предизвиците со кои се соочува производството на батерии во Европа во споредба со САД и Кина.
Германската единица објави нето добивка од 77,1 милиони евра (88,2 милиони долари) за 2025 година, што е зголемување за околу 20 милиони евра во однос на претходната година, и покрај она што го опиша како предизвикувачка пазарна средина.
Приходите паднаа на 7,1 милијарди евра од 7,7 милијарди евра во 2024 година, додека производството на возила падна на околу 202.000 единици од околу 211.000. Тесла го припиша падот главно на промените во моделите и воведувањето нови варијанти, додавајќи дека вкупното производство останало стабилно.
Фабриката во Гринхајде – единствениот производствен погон на Тесла во Европа – се отвори во март 2022 година и моментално го произведува Модел Y. Според извештајот, таа вработила околу 11.000 луѓе на крајот на 2025 година, вклучувајќи ги и привремените работници.