Корпорацијата Тојота соопшти дека ќе ја прекине работата во ноќна смена во производствена линија во фабрика во централна Јапонија поради избувнувањето на Ковид-19.
Суспензијата доаѓа во време кога јапонскиот производител на автомобили сериозно се обидува да го зголеми производството, кое постојано го намалуваше во кварталот април-јуни поради корона мерките за заклучување во Кина и глобалниот недостиг на чипови, како резултат на што потфрли за околу 10 отсто од планираното производство во тој период, пренесува Танјуг.
Вкупно 16 работници се заразени со Ковид-19 во фабриката на Тојота во префектурата Аичи, што отежнува компанијата да обезбеди доволно работници за смената, се вели во соопштението.
Прекинот на работа во третата смена ќе влијае на производството на околу 660 возила, изјави портпаролот на Тојота за Ројтерс.
На крајот на јули, компанијата исто така ја прекина работата во ноќна смена во друга фабрика на два дена поради истата причина.
Најголемиот светски производител на автомобили според продажбата се задржа на својата цел на глобално производство од 9,7 милиони единици во фискалната година на компанијата која завршува во март 2023 година.
