Администрацијата на американскиот претседател Доналд Трамп од денес ќе воведе нови царини од 10 и 12,5 проценти за стоките на 60 трговски партнери, вклучувајќи ја и Европската Унија, поради, како што вели тој, недоволно спроведување на забраните за принудна работа, објавија синоќа високи функционери на американската администрација.
Новите царини ќе стапат на сила откако ќе истече привремената глобална царина од 10 проценти, воведена во период од 150 дена откако Врховниот суд на САД во февруари ги поништи таканаречените реципрочни царини на Трамп од 10 до 50 проценти, кои беа воведени минатата година во рамките на вонредните овластувања за намалување на трговскиот дефицит, објавува Ројтерс.
Официјални лица од Белата куќа изјавија дека новите мерки не се замена за царините што истекуваат, иако се воведуваат истовремено и го опфаќаат речиси целиот увоз од САД.
Според нив, Соединетите Американски Држави имаат построги забрани за увоз на стоки произведени со принудна работа од другите земји и ги спроведуваат поконзистентно, поради што, како што тврдат, американските производители се во неповолна положба во споредба со конкуренцијата.
Тие додадоа дека и демократите и републиканците во Конгресот со години повикуваат на отстранување на принудната работа од глобалните синџири на снабдување и дека Трамп „секогаш ќе ги користи алатките што му се на располагање“ за спроведување на трговската политика, вклучително и царините.
Нафтата и гасот, ѓубривата, одредени прехранбени производи, како и производите кои веќе подлежат на царински давачки воведени од причини поврзани со националната безбедност, како што се автомобилите, челикот, алуминиумот и бакарот, ќе бидат ослободени од новите давачки.
Стоките што ги исполнуваат барањата на Договорот меѓу САД и Мексико и Канада (USMCA) исто така ќе бидат ослободени, поради високата поврзаност на северноамериканските производствени синџири.
Според конечната одлука, увозот од земјите што имаат соодветни закони против принудна работа ќе биде оданочен со царинска давачка од 10 проценти, додека стоките од земјите со, според Вашингтон, недоволно строги прописи ќе бидат оптоварени со царинска давачка од 12,5 проценти.
Службениците изјавија дека некои земји, вклучително и Индија, оттогаш усвоија нови мерки против принудна работа, кои ќе имаат пониска стапка од 10 проценти што ќе се применува на нивниот извоз.