Црна Гора губи по 30 милиони евра поради закуп на станови “на црно“

7

Во Црна Гора има околу 100.000п потстанари, па државата поради неоданочување на закупот на станови годишно губи и до 30 милиони евра. Од тамошното Здружение на потстанари, велат дека би било добро државата да воведе ред на пазарот и да го оданочи изнајмувањето на станови. Парите од оданочувањето на закупот на станови би требало да се користи за станбен фонд, односно за изградба на станови и обезбедување покрив на глава за голем број лица, пренесува Cafe del Montenegro.

“Цените на закупнините често се премногу високи и повеќето граѓани кои работат за плата од 300 евра, а плаќаат кирија 200 евра навистина не можат да издржат. Државата баш и нема некоја голема улога и волја да помогне, лично не знам дали постои било каква услуга во служба на државата што им помага на потстанарите“, вели Сања Букилиќ од здружението.

Таа оценува дека не е во ред на државните функционери со високи плати да им се продаваат станови со месечна рата од околу 70 евра.

“Многу е важно да се направи фонд за помош бидејќи е многу дискриминирачки некој кој прима плата од над 1.000 евра, има услови да купи стан по нереални поволности и плаќа рата за тој стан од 60 д0 70 евра, а луѓе кои живеат на раб на егзистенција и преживуваат со 300 евра и тоа како потстанари, не можат да си го дозволат тоа“, вели таа.

Според здружението, секое издавање на станбена единица којашто е во сопственост на граѓанин, има облик на економска дејност и како таква мора да биде оданочена и од тие средства да се решат проблемите на потстанарите.

Фото: Pexels