Амстердам планира да го зголеми данокот за ноќевање на 12,5 отсто од цената на хотелската соба, додека патниците на бродовите за крстарење ќе плаќаат 11 евра по лице, наместо досегашните осум евра.
„Амстердам ќе има највисока туристичка такса во Европа кога ќе има ново зголемување следната година“, изјави за „Dutch News“ функционерот за градски финансии Хестер ван Бурен.
Според неа, весникот имплицира дека туристите ќе плаќаат просечен данок од 22 евра за ноќ, наместо досегашните 15 евра за соба чие изнајмување чини 175 евра, што, како што наведе, е четврти највисок данок во светот.
Градската администрација планираше пониско покачување, но одлучи да ја зголеми стапката по притисокот од Советот.
Од туристичката такса градот следната година очекува да собере вкупно 65 милиони евра, јавува Танјуг.
Целта, рече Ван Бурен, е да се платат услугите за локалните жители, а не нужно да се обесхрабруваат луѓето да го посетат градот.
„Тоа е чин за балансирање и проценка. Секако дека би било добро високите даноци да помогнат во борбата против прекумерниот туризам, но би донел и помал приход“, изјави Ван Бурен.
Таа истакна дека разговарала со други градови кои се борат со голем број туристи, како што се Венеција и Барселона.
„Треба да размислиме како да ги натераме дневните посетители да плаќаат некаков градски данок“, додаде таа.
Во наредните недели, градскиот совет ќе разговара за буџетот со Ван Бурен и ќе изврши притисок за промени што ќе се проценат дека се неопходни. Конечниот буџет ќе биде усвоен во ноември.
Холандската престолнина се бори со зголемен број туристи, а градот во моментов спроведува голем пакет мерки за борба против прекумерниот туризам со цел да се ограничи бројот на домашни и странски посетители на 20 милиони, пишува холандскиот весник.
Амстердам презеде многу мерки за намалување на туризмот, особено во преполниот центар на градот.
