Турската централна банка ја зголеми основната каматна стапка за пет процентни поени на 35 отсто.
Новата гувернерка на турската централна банка, Хафизе Гаје Еркан, го направи првото зголемување од 8,5 на 15 отсто на нејзиниот прв состанок во јуни. Банката во септември ја зголеми основната каматна стапка од 25 на 30 отсто.
Стапката на инфлација во Турција го достигна врвот во октомври минатата година, кога изнесуваше 85 проценти. Минатиот месец, според француската новинска агенција АФП, повторно се искачи над 60 отсто.
На почетокот на септември турскиот претседател Реџеп Таип Ердоган најави значителна промена во економската политика на земјата. Тој јавно кажа дека земјата ќе се справи со намалувањето на инфлацијата со заострување на монетарната политика. Дотогаш, во борбата против инфлацијата, спротивно на општото верување на економистите, тој цврсто се залагаше за ниски каматни стапки.
Ердоган им рече на своите поддржувачи во средата дека Турција води повеќеслојна борба против инфлацијата. „Потребно е време да се види како чекорите преземени во економијата се рефлектираат во секојдневниот живот на луѓето“, рече тој, според АФП.