Првиот македонски интернет сервис провајдер Унет започнува со низа активности со кои ќе ја одбележи 20-годишнината од своето формирање и работење.
Одбележувањето на 20-от роденден ќе биде одбележано во следните три месеци, преку серија на активности, меѓу кои примарно место ќе заземе промовирањето на сервисот Унет веб дизајн, како и реализација на проектот за инвестирање во заедницата. Како општествено одговорна компанија, Унет во соработка со факултетите од областа на ITC, ќе додели целосни стипендии на најдобрите и најталентирани студенти, кои се образуваат на некои од државните технички факултети.
Унет е првиот македонски интернет провајдер, формиран во 1995 година на 20-ти април, датум кој и официјално се смета за почеток на интернет комуникацијата во Македонија. Од формирањето до денес, Унет постојано расте, се развива и усовршува, притоа следејќи ги најновите трендови, техники и технологии од областа на интернет и технолошките комуникации.
Забележителна е и улогата на Унет во експанзијата на употребата на Интернет пристапот во Македонија на национално ниво во 1995 година, како и изработката на првата веб страна во Македонија www.mkd.com.mk. Во своето портфолио од 2014 година, Унет го вбројува и Унет Регистарот, како комплетен сервис за регистрирање и обнови на сите типови домени.
Во моментот, Унет ги нуди следните сервиси и услуги: хостирање со Cloud хостинг, регистрација и обнова на домени (Унет Регистар) и целосен веб дизајн.
Слоганот на компанијата за оваа јубилејна 2015 година е 20 години над облаците.
