Унгарската влада одлучи да ги одложи планираните инвестиции за следната година, во вредност од 755 милијарди форинти (2,3 милијарди долари), со цел да го намали буџетскиот дефицит и да ги зајакне државните финансии, по постојаното предупредување од централната банка дека ризиците за економијата растат.
Владата на премиерот Виктор Орбан, која се соочува со тесен изборен натпревар против фронтот на опозициските партии следната година, рече дека мерката е потребна за да се намали буџетскиот дефицит во 2022 година на 4,9 отсто од бруто домашниот производ од првично целното ниво од 5,9 отсто од БДП, пренесе Ројтерс.
Буџетот на Унгарија забележа рекорден дефицит од 1,0 трилиони форинти (3,0 милијарди долари) во ноември, поттикнат од зголемените предизборни трошоци, при што неодамнешните анкети покажуваат дека обединетата опозиција има малку поголема поддршка од партијата Фидес на Орбан.
„Поттикнувањето на унгарската економија со јавни инвестиции во толку големи размери повеќе не е неопходно“, се вели во соопштението на Министерството за финансии во средата.
Унгарија, сепак, сè уште е на пат да постигне еден од најголемите буџетски дефицити во Европската унија следната година, бидејќи дефицитот од 4,9 отсто од БДП во државната каса го надминува просекот од 3,6 отсто за блокот од 27 земји кој Европската комисија го предвиде во своите најнови прогнози.
Соопштението уследи откако унгарската влада на почетокот на месецов објави одлука за одложување на јавните инвестиции во тековната година во износ од уште 350 милијарди форинти (1,07 милијарди долари), а откако беа прекинати преговорите за државно купување на аеродромот во Будимпешта.
Владата рече дека потезите ќе создадат фискален простор за финансирање други мерки, како што се 2,0 милијарди долари даночни олеснувања за домаќинствата, укинување на даноците на доход за почетните претприемачи и помош за пензионерите во износ од една просечна месечна пензија следната година.
