Uniper: „Газпром” е несигурен снабдувач со гас

27

Германскиот енергетски концерн Uniper смета дека „Газпром“ ги прекршува долгорочните договори за снабдување со гас и дека престанал да биде сигурен снабдувач за германскиот пазар, се вели во објавениот извештај на компанијата.

„Од 14 јуни 2022 година до денес, Uniper добива само меѓу 20 и 40 отсто од договорените количини гас од „Газпром“. На овој начин „Газпром“ ги прекрши долгорочните договори за снабдување со гас и стана несигурен снабдувач за Uniper и германскиот пазар на гас“, се наведува во документот.

Поради намалените испораки на гас на „Северен тек“, Uniper е принуден да купува гас на пазарот по значително повисоки цени, забележува концернот. Во моментов, испораките на гас на Uniper преку „Северен тек“ се намалени за 80 отсто, а компанијата добива само 20 отсто од договорените количини.

Uniper уште еднаш истакна дека ги смета за неосновани околностите на виша сила прогласени од „Газпром“ и официјално ги отфрла.

Uniper претходно ја сметаше вишата сила на „Газпром“ во врска со испораките на гас како прекршување на договорот и рече дека може да преземе правни мерки по ова прашање.