Еден германски турист бил толку налутен од добро познатиот проблем со „резервирање“ лежалки на плажа што решил да го тужи туристичкиот оператор.
За време на семеен одмор на грчкиот остров Кос, за кој платил 7.186 евра во август 2024 година, тој бил огорчен бидејќи лежалките на плажата биле зафатени секое утро пред појадок, пишува „Тајмс“.
Иако едно од правилата на хотелот конкретно забранувало оставање крпи на лежалките преку ноќ, се чини дека гостите не го почитувале ова. Незадоволниот турист во тужбата навел дека дошол на плажата веќе во 6 часот наутро, но сите лежалки веќе биле зафатени до тој момент, пренесува Индекс.
Тој се пожалил на Окружниот суд во Хановер дека неговото семејство губи околу 20 минути секој ден барајќи слободно место како резултат на тоа, а децата честопати морале да лежат на крпи на земја. Тој исто така истакнал дека персоналот на хотелот ги игнорирал нивните жалби.
Судот пресуди дека аранжманот бил неисправен
Судот во Хановер ги прифати неговите аргументи и пресуди дека туристот има право на враќање на дел од парите во износ од 986,70 евра. Во образложението се наведува дека пакет аранжманот бил неисправен бидејќи не ја обезбедил услугата што гостинот со право можел да ја очекува.
Судиите појаснија дека туристичката агенција, иако не управувала директно со хотелот и не била обврзана да обезбеди лежалкa за секој гостин во секое време, сепак сноси дел од одговорноста. Нејзина должност била да обезбеди организација што овозможува разумен сооднос помеѓу бројот на лежалки и бројот на гости.